Нашар көретіндерге арналған нұсқа 
2024 жылдың 25-27 қарашасында Ташкент мемлекеттік заң университетінің ректоры Рустамбеков Исламбек Рустамбекович Maqsut Narikbayev University-ге ресми сапармен келді. Сапар аясында Исламбек мырза бірқатар стратегиялық кездесулер өткізді. Оның басты мақсаты 5 жыл бойы университеттер жүзеге асырып келе жатқан “Халықаралық құқық” қос дипломды білім беру бағдарламасын ілгерілету және дамыту болды.
Сонымен қатар, Исламбек мырза Құқық жоғары мектебінің студенттеріне халықаралық коммерциялық төрелік тақырыбында қонақ дәріс оқыды. Беделді халықаралық төреліктердің (инвестициялық дауларды реттеу жөніндегі халықаралық орталықтың (ICSID), Гонконг халықаралық төрелік орталығының (HKIAC), Куала-Лумпурдағы (Малайзия) Азия Халықаралық төрелік орталығының (AIAC), Делостағы тәуелсіз төрелік институттың және басқалардың) танылған төрешісі бола отырып, Исламбек Рустамбекович өзінің тәжірибесіндегі ең қызықты жағдайларды баяндады. Болашақ заңгерлер арбитраждардың жұмыс істеу ерекшеліктеріне, осы саладағы мансаптық өсу мүмкіндіктеріне, сондай-ақ Исламбек мырзаның халықаралық аренада жеке брендті қалыптастыруға қатысты кеңестеріне қызығушылық танытты.
Сапар барысында Исламбек мырза қос диплом бағдарламасы бойынша MNU-да оқитын ТМЗУ студенттерімен кездесу өткізді. Студенттер университеттің академиялық мүмкіндіктері мен мансаптық перспективаларына қызығушылық танытты, сонымен қатар MNU-да білім алу сапасына көз жеткізіп, бағдарламаны Өзбекстанда кеңінен насихаттау үшін бірнеше бастамалар ұсынды.
Маңызды оқиғалардың бірі – MNU кітапханасында ТМЗУ аймағының ашылуы. Профессор Рустамбеков кітапханаға заңды бағыттағы 30-дан астам кітапты тапсырды, оның бір бөлігі оның жеке авторлық кітаптары. Бұл кітаптар университеттің кітап қорын едәуір байытты, бұл бастаманы студенттер де, оқытушылар да жоғары бағалады.
Сапар қорытындысы бойынша қос дипломды бағдарламаны одан әрі іске асыру, серіктес жоғары оқу орындарында әріптестік инфрақұрылым құру, сондай-ақ шетелдік ұтқырлық бағдарламасы шеңберінде студенттер мен оқытушылар санын арттыру бойынша бірқатар уағдаластықтарға қол жеткізілді.
