Нашар көретіндерге арналған нұсқа 
Maqsut Narikbayev University-де көру қабілеті нашар және зағип жандар үшін медиақолжетімділікті қамтамасыз ететін негізгі құрал – аудиодескрипцияны дамытуға арналған SenseAble халықаралық конференциясы өтті. Іс-шараны MNU Жоғары гуманитарлық мектебі мен Gala Global Group ірі аударма компаниясы бірлесіп ұйымдастырды.
SenseAble конференциясы медиақолжетімділік саласындағы жетекші халықаралық сарапшыларды біріктірді. Спикерлер қатарында аудиодескрипцияның пионері, әдістеме мен оқу бағдарламаларының авторы Джоэл Снайдер (АҚШ), 2022 жылы Қатарда өткен футболдан әлем чемпионатында «жанды» аудиодескрипция жасаған әлемдік деңгейдегі маман Жозелия Невес (Португалия) және медиақолжетімділікті зерттеуші, Барселона университетінің профессоры Анна Матамала (Испания) болды. Сарапшылар мүмкіндігі шектеулі жандар үшін медиақолжетімділік саласындағы инновациялық шешімдерді, үздік тәжірибелерді және зерттеулерді таныстырды.
«Maqsut Narikbayev University Қазақстанда алғаш рет магистратураның аудиовизуалды аударма бағдарламасы аясында «Audio Description, Subtitling for the Deaf and Hard of Hearing» курсын енгізді. Бұл жай ғана жаңа пән емес, бұл – инклюзияға және есту қабілеті бұзылған жандар үшін қолжетімді орта қалыптастыруға жасалған үлкен қадам. Аталған курс Қазақстанда және оның шегінен тыс медиақолжетімділік саласында жаңа мүмкіндіктер ашады. Біз университетіміздің осы маңызды салаға үлес қосып отырғанына мақтанамыз», – деді MNU Жоғары гуманитарлық мектебінің деканы Анар Ибраева.
Конференция барысында аудиодескрипциясы бар көркем фильмдер көрсетіліп, осы бағыттың дамуына арналған отандық және халықаралық жобалар таныстырылды. Қатысушылар музей экспонаттарын бейімдеу мәселесін талқылап, театр қойылымдарына аудиодескрипция енгізу тәжірибесін қарастырды. Сонымен қатар, қазақстандық фильмдер мен қолжетімді визуалды контент жасауды көздейтін мәдени жобалармен танысты. Іс-шара Қазақстанда медиақолжетімділік пен инклюзияны дамытудағы маңызды қадамға айналып, MNU-дің аударма және контент қолжетімділігі саласындағы инновациялық орталық ретіндегі орнын нығайтты.
Еске сала кетейік, аудиодескрипция – бұл көру қабілеті нашар және зағип жандарға арнайы бейімделген ақпарат. Аудиодескрипция экранда болып жатқан оқиғаларды сипаттайды, оның ішінде физикалық әрекеттерді, бет-әлпет көріністерін, костюмдерді, қоршаған ортаны және сахнадағы өзгерістерді қамтиды. Мысалы, бұл формат қазірдің өзінде Netflix стримингтік сервисінің көптеген түпнұсқалық фильмдері үшін қолжетімді.