MNU студенттері тәуекел-менеджмент бойынша кейс-чемпионатта үздік атанды

Maqsut Narikbayev University Халықаралық экономика мектебінің студенттері тәуекел-менеджмент бойынша өткен кейс-чемпионатта бірінші орынды иеленді. «Risk Management Case Competition 2025» атты турнир жоғары оқу орындарының студенттері мен магистранттары арасында өтті. Сайысты ҚР Қаржы нарығын реттеу және дамыту агенттігі мен KBTU ұйымдастырды.

Risk Management Case Competition – жас мамандар өздерінің сыни ойлау қабілетін, креативті көзқарасын және тәуекел-менеджмент пен модельдеу саласында стандарттан тыс шешімдер табу шеберлігін көрсететін интеллектуалды платформа. Чемпионаттың мақсаты – машиналық оқыту әдістерін қолдана отырып, антифрод-модельдерді әзірлеуге қатысты практикалық тапсырманы шешу. Бұл – нақты жағдайда деректерді кешенді түрде талдауды, алгоритмдерді оңтайландыруды және модельдердің дәлдігін қамтамасыз етуді талап ететін маңызды міндет.

Нәтижесінде MNU-дың «Blue Ocean» командасы 21 университеттен қатысқан 81 команданың арасынан үздік деп танылды. Екінші орынды IITU мен KBTU командалары бөлісті. Сонымен қатар MNU студенттері AITU мен Nazarbayev University өкілдерімен бірлесіп құрылған «BIG4» командасының құрамында қола медальға ие болды.

Айта кетейік, жеңімпаздар халықаралық FRM 1 емтиханын тапсыруға арналған грантқа ие болып, банктерде кәсіби тәжірибеден өтуге шақырту алды.