Аустрия Елшісі MNU студенттеріне заманауи дипломатияның рөлі туралы айтып берді

Maqsut Narikbayev University-ге Аустрияның Қазақстандағы Төтенше және Өкілетті елшісі Андреа Бахер келді. Ол «Қолданбалы дипломатия» курсы аясында дәріс оқыды.

Андреа Бахер XXI ғасырдағы дипломатияның рөлі мен оның сыртқы саясаттан айырмашылығы туралы айтып берді. Ол хаттама мен этикетті сақтаудың ерекшеліктерімен бөлісіп, сондай-ақ қазақ-аустрия қарым-қатынастарының дамуын атап өтті. Сонымен қатар Елші «Халықаралық қатынастар» мамандығы студенттерінің сұрақтарына жауап берді.

«Маған MNU-ға келу ұнайды, өйткені мұнда өте әдемі ғимарат және керемет кітапхана бар. Студенттер ашық, ерекше ынталы. Болашақ дипломаттарға шетелге көбірек саяхат жасап, тәжірибе жинақтауды кеңес беремін. Түрлі мәдениеттер өкілдерімен өзара іс-қимыл жасап, барлық мүмкіндіктерді пайдалану қажет», – деді Андреа Бахер.

Айта кетейік, Аустрия Қазақстанның Орталық Еуропадағы жетекші сауда серіктестерінің қатарына кіреді.