MNU мыңнан астам білікті маман даярлап шығарды

Maqsut Narikbayev University (MNU) мыңнан астам білікті маман даярлап шығарды. Жоғары оқу орнының Фемида саябағында 31-ші диплом табыстау рәсімі өтті.

Университет құқық, экономика, дипломатия, журналистика, лингвистика және туризм салаларында бакалаврлар мен магистрлерді даярлады. Олардың арасында беделді ұлттық және халықаралық сайыстардың жүлдегерлері, АҚШ пен Германияның жетекші жоғары оқу орындарымен бірлескен қос диплом иегерлері, сондай-ақ «Үлкен төрттік» компаниялары, мемлекеттік органдар, түрлі ведомстволар мен ірі кәсіпорындарда жұмыс істеуге шақырту алған көптеген түлектер бар. MNU Басқарма төрағасы Талғат Нәрікбаев түлектерді құттықтап, жоғары оқу орнының есігі олар үшін әрқашан ашық екенін атап өтті.

«Оқу жылдары cіз тек қана білім алумен шектелген жоқсыз. Сіз тәжірибе жинақтап, қиындықтарды еңсеруге, командада жұмыс істеуге, шешім қабылдауға және жауапкершілікті өзіне алуға үйрендіңіздер. Осы қасиеттер болашақтағы табысыңызды айқындайды. Біз үлкен өзгерістер дәуірінде өмір сүрудеміз. Жасанды интеллект, жаңа технологиялар мен жаһандық сын-қатерлер әлемді бұрынғыдан да жылдам өзгертуде. Бірақ өзгеріссіз қалатын құндылықтар бар. Ол – адалдық, кәсібилік, адамдарға құрмет, білімге ұмтылу және қоғам мен елге пайда әкелуге дайын болу», – деді Талғат Нәрікбаев.

2026 жылдың түлектерін ҚР Ғылым және жоғары білім министрі Саясат Нұрбек пен MNU Провосты Анар Ибраева да құттықтады. Салтанатты іс-шараға 3500-ден астам адам қатысты. Олардың қатарында ҚР Парламенті Мәжілісінің депутаттары, ҚР Үкіметі мен Астана қаласы әкімдігінің өкілдері, отандық ірі медиахолдингтер мен халықаралық компаниялардың басшылары, дипломатиялық миссиялардың қызметкерлері бар.

«MNU Қазақстанның үздік жеке университеттерінің біріне айналды. Жақында ғана іске қосылған Халықаралық журналистика мектебі еліміздегі мықтылар қатарына кіреді. Мен бүгін осы мектепті бітірген достарымның балаларын көруге қуаныштымын. Құқық жоғары мектебі еліміздің ең үздік заң мектептерінің бірі болып саналады. Халықаралық экономика мектебі ағылшын тілінде толыққанды білім беруді ұсынады. Отандық жоғары білім беруде мұндай мүмкіндіктер әзірге көп емес. Сондай-ақ, бірнеше жыл бұрын мен сабақ беру құрметіне ие болған Бизнес мектебі де бар. Бұл шын мәнінде еліміздің үздік бизнес мектептерінің бірі. Қазақстан бір ғана буын аралығында өз жерінде әлемдік деңгейдегі сапалы жоғары білім алу үшін жағдай жасай алды. Мұны бағалаңыздар», – деді Саясат Нұрбек.

Түлектер патриотизм, адалдық және әділдік идеалдарын ұстануға, сондай-ақ мемлекеттің гүлденуі үшін бар білімдері мен күштерін жұмсауға ант берді. Рәсім барысында бірқатар диплом иегерлері жоғары оқу орнының дамуына қосқан үлесі мен жетістіктері үшін ерекше атап өтілді. Олардың арасында Құқық жоғары мектебінің түлегі Әнел Сапарғалиева бар, ол MNU командасының құрамында Қазақстан тарихында алғаш рет Филип Джессоп атындағы халықаралық құқық бойынша беделді студенттік байқауда 12-ші орынға ие болды.

«Мен үшін университет алғаш рет оның табалдырығын аттағанда ойлағаннан да көп оқиғалар болған орынға айналды. Мұнда мен билеу тәжірибесінің мүлдем жоқтығына қарамастан, Президенттік балда өнер көрсеттім. Сондай-ақ Вашингтонға сапарға дайындалдым, кейін ол жерде Шырмауық Лигасының университеттерін жеңе алдым және біз, MNU студенттері, Отанымыздың туын мақтанышпен көтердік. Бұл шынымен де ұмытылмайды. Осы жерде мен ойшылдарды таптым және айналамыздағы әлемді ғана емес, мені де өзгертетін идеяларды жүзеге асырдым», – деді Әнел Сапарғалиева.

Іс-шара танымал қазақстандық әнші Айқын Төлепбергеннің өнер көрсетуімен және мерекелік отшашумен аяқталды.