Олимпиада Archives

MNU-да алғаш ретжурналистика мамандығы бойынша республикалық олимпиада өтті

21-22 сәуірде Maqsut Narikbayev University–де «Журналистика және ақпарат» бағыты бойынша жоғары оқу орындары арасында XVII Республикалық пәндік олимпиада өтті. Биыл студенттік жарыс Қазақстанның түрлі өңірлерінен 17 команданы біріктіріп, медиадағы мансапты армандайтын ең талантты және өршіл студенттерді жинады.

Олимпиада қорытындысы бойынша Алматы облысының SDU University студенттері топ жарды. Айта кетейік, іс-шара алғаш рет Maqsut Narikbayev University қабырғасында өтті, себебі университет өткен жылғы жарыстың жеңімпазы болып табылады. MNU командасы бастаманы және жүлделі орындарды басқа университеттерге табыстап, байқаудан тыс қатысып, жоғары дайындық деңгейін және нағыз командалық рухты көрсетті.

«Біз үшін Maqsut Narikbayev University-де журналистика мамандығы бойынша республикалық пәндік олимпиаданы өткізу үлкен мәртебе. Сайыс 2023 жылы өз есігін ашқан Халықаралық журналистика мектебінің дамуындағы маңызды қадам болды. Бұл оқиға білім алмасу және студенттер мен оқытушылар арасында жаңа байланыстар орнату үшін тамаша платформаға айналды», – деді MNU провосты Сергей Пен.

Пәндік олимпиада төрт кезеңнен тұрды. Бірінші турда қатысушылар команданың ауызша көрсетілімі мен бейне таныстырылуын ұсынды. Екіншісінде – кездейсоқ кілт сөздер мен кеңестерді пайдалана отырып, ақпараттық жазба мен телесценарий жазу болды. Айта кетейік, әділдік принципін сақтау үшін барлық жұмыстар жасырын тексерілді. Үшінші кезең зияткерлік квиз форматында өтті. Бұл кезеңде студенттер журналистика тарихы, медиаэтика және фактчекинг бойынша сұрақтарға жауап берді. Ал шешуші кезеңдегі дағдарыстық симуляция беріктікке шынайы тексеру болды. Қатысушылар ақпараттық вакуум жағдайында редакциялық жұмыстың нақты сын-тегеуріндеріне барынша жақындатылған материалды дайындауы қажет болды.

«Олимпиада жоғары деңгейде ұйымдастырылды және бәсекелестік өте күшті болды. Біздің команда және бүкіл университет үшін осындай беделді іс-шарада жеңіске жету үлкен мәртебе. Біз MNU-ға жылы қабылдағаны және сайысты жоғары деңгейде ұйымдастырғаны үшін алғыс айтамыз», – деп атап өтті SDU University студенті Дінмұхамед Болат.

Айта кетейік, олимпиаданың негізгі миссиясы – үздіктерді анықтау ғана емес, сонымен қатар қарым-қатынас жасауға, тәжірибе алмасуға және кәсіби өсуге арналған кеңістік құру.

Сандық трансформация дәуіріндегі құқық: MNU-да төрт елдің студенттері ТМД-дағы алғашқы Легатонда сайысқа түсті

18-19 сәуірде Maqsut Narikbayev University-де (MNU) Қазақстан, Қырғызстан, Ресей және Өзбекстан студенттерінің басын қосқан ТМД-дағы алғашқы International Legathon MaxUP 2025 бірегей халықаралық іс-шарасы өтті. Заң саласындағы кейс-чемпионаты зерттеу форумымен біріктірілді, онда студенттер жасанды интеллектінің (ЖИ) қарқынды дамуы жағдайында құқықтың болашағын моделдеді.

Legathon MaxUP 2025 басты тақырыбы – жасанды интеллект дәуіріндегі этика және құқық. Тоғыз студенттік команда ЖИ-ның адамның негізгі құқықтарына әсер етіп, теңдессіз құқықтық сын-қатерлерді туғызған сценариймен жұмыс істеді. Екі күн бойы олар күрделі кейстерді талдап, нормативтік тәсілдерді әзірледі және цифрлық құқықтың өзекті мәселелері бойынша зерттеу жобаларын қорғады.

Мемлекет басшысы Қасым-Жомарт Тоқаев бұған дейін азаматтардың жасанды интеллект саласындағы сауатын ашып, біліктілігін арттыру қажет екеніне назар аударды. Сонымен қатар, өткен аптада Маңғыстау облысына жұмыс сапары барысында Қазақстан Президенті қазір жаңа технологиялар мен жасанды интеллект бағыттарын дамыту өзекті болып отырғанын атап өтті. ЖИ-дің сың-қатерлерімен байланысты Legathon-ның өзекті тақырыбы Ала-Тоо Халықаралық университеті (Бішкек қ., Қырғызстан), УрГЮУ (Екатеринбург қ., Ресей), «Жоғары экономика мектебі» Ғылыми-зерттеу университеті (Мәскеу қ., Ресей), ТГЮУ (Ташкент қ., Өзбекстан), MNU (Астана қ.), Yessenov University (Ақтау қ.), Әл-Фараби атындағы ҚазҰУ, AlmaU, Абылай хан атындағы ҚазХҚжӘТУ (барлығы Алматы қаласынан) студенттерінің қызығушылығын тудырды.

«Біз үшін бірінші Legathon өз өмірін заң үстемдігі мен әділеттілікті орнықтыруға арнаған, білім ордамыздың құрметті ректоры Мақсұт Сұлтанұлы Нәрікбаевтың туғанына 85 жыл толуына орай өтіп жатқаны ерекше маңызды. Біз идеялар бірігетін кеңістік құрғымыз келеді, ал студенттер тек қатысушылар емес, жаңа заң шешімдерінің тең авторларына айналады. Бұл Легатон – болашақ құқығы, бүгінде оқулықтарда жоқ сын-қатерлер туралы», – деп атап өтті MNU басқарма төрағасы Талғат Нәрікбаев.

Студенттер денсаулық сақтау саласында ЖИ пайдалану кейсі бойынша шешімдерді және авторлық зерттеулерді ұсынды. Олар дербес ЖИ-жүйелерді жауапкершілікке тарту мен екі мақсаттағы технологияларды реттеуден бастап, сандық кемсітушіліктен қорғау мен жеке тұлғаның сандық көшірмелерін модельдеуге дейінгі тақырыптардың кең ауқымын қамтиды. Қатысушылар озық технологиялармен заң жұмысына дайындығын көрсете отырып, батыл тұжырымдамалар мен стандартты емес тәсілдерді ұсынды. Командалардың жұмысын Бас прокуратура, Әділет министрлігі, Жоғарғы Сот өкілдері мен жетекші халықаралық және қазақстандық заң компанияларының серіктестерінен құралған жоғары кәсіби қазылар алқасы бағалады.

«Барлығы жоғары деңгейде, тіпті ұсақ-түйекке дейін ойластырылған. Мысалы, біз тек дауыс бергеннен кейін ғана қатысушылардың қай университеттен келгендерін білдік. Мұндай жарыстар студенттерге нағыз практика мен баға жетпес тәжірибе алуға мүмкіндік береді. ЖИ – бүгінгі таңда ең өзекті тақырыптардың бірі. Енді Legathon MaxUP 2026-ны асыға күтеміз», – деді ҚР әділет вице-министрі Даниель Ваисов.

Айта кетейік, сайысты жыл сайын өткізу жоспарланған. Жүлде қоры 1,7 миллион теңгені құрады. Бірінші орынға «Жоғары экономика мектебі» Ғылыми-зерттеу унтверситетінің (Мәскеу қ., Ресей) студенттері ие болды.

«Іс-шараның атмосферасы керемет, ал қатысушылар өте жылы шырайлы болды. Біздің жұмысымыздың жоғары бағаланғанына қуаныштымыз. Бұл шынымен де шабытты тәжірибе болды», – деді «Жоғары экономика мектебі» командасының мүшесі Татьяна Жмурина.

Бірінші халықаралық Legathon MaxUP 2025 құқық пен технология арасындағы диалогты қалыптастырудағы маңызды қадам болды. Сондай-ақ, студенттерге өз білімдерін практикада қолдану мен саланың қазіргі және болашақ мамандарымен тәжірибе алмасуға мүмкіндік берді. MNU цифрлық трансформация жағдайында тиімді жұмыс істей алатын заңгерлердің жаңа буынын дайындауға үлес қоса отырып, осы форматты дамытуды жалғастырады.

Қазақстандық құқықтанудың болашағы: MNU студенті кейс-чемпионатында 500 000 теңге иегері атанды

Бүгін Maqsut Narikbayev University құрметті MNU түлегі, заңгер, Sayat Zholshy & Partners Заң компаниясының аға серіктесі – Арман Бердалиннің бастамасымен ұйымдастырылған азаматтық құқық бойынша кейс-чемпионат өз мәресіне жетті.

Байқау тақырыбы – заңды тәуекелдерді талдау және Қазақстанда бизнесті сатып алу кезінде құқықтық қорғауды қамтамасыз ету – қатысушылардан терең құқықтық білімді, қазіргі қазақстандық практика жағдайында стратегиялық ойлау және заңдық шешімдерді негіздеу қабілетін талап етті.

Арман Бердалин әр жұмыспен жеке танысып, сараптамалық кері байланыс беру арқылы студенттерді өзінің шынайы көзқарасымен шабыттандырып, салтанатты түрде жеңімпазды жариялады. Бас жүлде – 500 000 теңге сомасындағы сертификаттың иегері MNU Жоғары құқық мектебінің 3 курс студенті Темірлан Абдуллин болды.

Темірлан – жай ғана үздік студенттердің қатарынан болып қана қоймай, сонымен қатар, AIFC Moot Court, Tukulov Moot жарыстарына, сондай-ақ халықаралық арбитраждық байқауларға қатысқан тәжірибелі студент. Отбасында ол – екі қарындасы мен інісіне қамқор аға, ата-анасының сенімі. Ал университет қабырғасында дарынды, мақсатшыл әрі ұстанымы берік азамат, оны еліміздің құқық саласындағы болашақ көшбасшысы деуге толық негіз бар.

Біз Арман Бердалин мырзаға талантты студенттерді қолдағаны, кәсіби көзқарасы және заңгерлердің жаңа буынын шабыттандыруға ұмтылғаны үшін шын жүректен алғыс білдіреміз. Мұндай бастамалар тұрақты құқықтық мәдениетті құруға және Қазақстанда заңгерлік кәсіпті дамыту үшін берік негіз қалыптастыруға көмектеседі.

MaxUP 2025: MNU-да төрт елдің студенттері құқық саласындағы инновациялық шешімдерін ұсынады

18–19 сәуір күндері Maqsut Narikbayev University-де құқық саласындағы инновациялық шешімдерді іздеуге арналған алғашқы халықаралық Legathon MaxUP 2025 өтеді. Қазақстан, Ресей, Өзбекстан және Қырғызстаннан келген тоғыз студенттік команда өз білімдерін көрсетіп, өзекті құқықтық мәселелер бойынша шешімдер ұсынады. Бұл халықаралық шара MNU Құрметті ректоры, мемлекет және қоғам қайраткері Мақсұт Нәрікбаевтың 85 жылдығына арналып отыр.

Іс-шара бағдарламасына мыналар кіреді:

– нақты құқықтық мәселелерді шешуге арналған ғылыми жобаларды командалық түрде дайындау;

– нақты заңдық кейстермен командалық жұмыс жүргізу;

– саланың жетекші сарапшыларынан менторлық қолдау;

– өз идеяларын академиялық қауымдастық, бизнес пен мемлекеттік құрылым өкілдеріне ұсыну мүмкіндігі;

– құнды жүлделер мен кәсіби дамуға арналған жаңа мүмкіндіктер.

Шара туралы толығырақ сілтеме арқылы танысуға болады.