Нашар көретіндерге арналған нұсқа 
Астанада Maqsut Narikbayev University-дің дәстүрлі Президенттік балы өтті. Бұл шара мәдени құндылықтардың сабақтастығын, сұлулық пен шабытты айшықтайтын жарқын символға айналды. Салтанатты кеш Қалибек Қуанышбаев атындағы Қазақ ұлттық музыкалық-драма театрында өтті.
Президенттік бал дәстүрі алғаш рет 2013 жылы бастау алды, ал соңғы үш жылда бұл шара университет аясынан шығып, елорданың мәдени өміріндегі маңызды оқиғаға айналды. Студенттік өмірдің ең басты оқиғаларының бірі мемлекет және қоғам қайраткері, заң ғылымдарының докторы, профессор Мақсұт Нәрікбаевтың құрметіне өткізіледі. Айта кетейік, биыл 30 наурызда MNU Құрметті ректорының туғанына 85 жыл толды.
«Президенттік бал – біздің университетіміздің әдемі дәстүрі. Студенттеріміз бұл күнге үлкен дайындықпен келеді. Бұл – сұлулықтың, жастықтың, қуаныштың кеші. Бал университетіміздің дамуына үлкен үлес қосқан, әділет пен білім жолында аянбай еңбек еткен Мақсұт Сұлтанұлының құрметіне арналады. Ата-аналарға – қолдауларыңыз үшін, ұстаздарға – еңбектеріңіз үшін алғыс айтамын», – деді MNU Басқарма төрағасы Талғат Нәрікбаев.
Кеш бағдарламасына дебютанттардың дәстүрлі қойылымдары, әсем би, жанды музыка және дарынды өнерпаздардың орындаулары енді. Шараға студенттердің ата-аналары, мәдениет қайраткерлері, шетелдік елшіліктер мен халықаралық ұйымдардың өкілдері қатысты. MNU Department of Student Affairs жетекшісі Жарас Асылбаев бұл балдың студенттер үшін маңыздылығын ерекше атап өтті.
«Президенттік бал – жай ғана салтанатты шара емес, ол университет мәдениетінің маңызды бөлігі. Бал түрлі жоғары мектептердің студенттерін біріктіріп, оларды шығармашылыққа және өзін-өзі дамытуға шабыттандырады. Жыл сайын бұл ерекше оқиға студенттер үшін асыға күтетін, мұқият дайындалатын әрі өмір бойы ұмытылмас жылы естеліктер сыйлайтын кешке айналады», – деді Жарас Асылбаев.
Президенттік бал – мәдени және қоғамдық бастамаларға жол ашатын ерекше алаң. Бұл шара бал өнерінің дамуына серпін беріп, жас дарындарды қолдауға, халықаралық байланыстарды нығайтуға және университеттің білім мен мәдениет ордасы ретіндегі беделін арттыруға ықпал етеді.
