Нашар көретіндерге арналған нұсқа 
Maqsut Narikbayev University қызметкерлерінің еңбегі мемлекеттік деңгейде тағы да атап өтілді. Ұлттық мереке – Республика күні қарсаңында олар жоғары наградаларға ие болды.
«Парасат» орденімен Emeritus Professor Төлеш Қаудыров наградталды. Қазақстан Президентінің атынан мемлекеттік награданы оған ҚР Әділет министрі Ерлан Сәрсембаев тапсырды. Бұл орден ғылым, мәдениет, әдебиет, өнер, мемлекет және қоғам қайраткерлерi, елдің рухани және зияткерлік әлеуетiн дамыту мен молайтуға зор жеке үлес қосқан азаматтарға, сондай-ақ адам құқықтары мен оның әлеуметтiк мүдделерiн қорғау жөнiндегi белсендi қызметi үшiн беріледі.
Төлеш Каудыров Қазақстанда және шетелде танымал заң ғылымдарының докторы және профессор. Заңгер-ғалым мемлекеттің құқықтық жүйесінің дамуына елеулі үлес қосты, Қазақстанның бірінші Конституциясының мәтінін әзірледі және Қазақ КСР-інің Мемлекеттік егемендігі туралы декларацияның қабылдануына куә болды. Ол білім саласында 35 жылдан астам уақыт жұмыс істейді, тең жартысына жуығы MNU командасында.
ҚР Әділет министрлігі Emeritus Professor Рамазан Нұртаевтың да еңбегін атап өтті. Оған ведомстволық марапат – «Еңбек ардагері» медалі табыс етілді. Медальді экономиканың түрлі салаларының қызметкерлері және зейнеткерлік жасқа жеткен, жалпы жұмыс өтілі 40 жылдан астам, оның ішінде бір салада кемінде 10 жыл, сондай-ақ еңбек қызметінде ең жоғары нәтижелерге қол жеткізген адамдар алады.
Заң ғылымдарының докторы, профессор Рамазан Нұртаевтың білім беру қызметі жарты ғасырға жуық уақытты қамтиды, оның ішінде 28 жыл MNU профессорлық-оқытушылық құрамының қатарында. Ол қылмыстық құқық пен криминологияның қазіргі заманғы проблемаларын әзірлеумен айналысқан көрнекті заңгер-ғалым ретінде танымал. Сондай-ақ 20-дан астам заң ғылымдарының кандидаты, 4 PhD докторын дайындап, 160-қа жуық ғылыми жарияланымдары жарық көрді.
Ұлттық мереке қарсаңында «Құрмет» орденімен Басқарма төрағасы Талғат Нәрікбаев наградталды. Қазақстан Президенті атынан мемлекеттік награданы оған Астана қаласының әкімі Жеңіс Қасымбек тапсырды. Орден азаматтарға экономика, әлеуметтiк сала, ғылым, мәдениет және бiлiм беру iсiн дамытуға сiңiрген еңбегi, мемлекеттiк органдардағы мiнсiз қызметi және белсендi қоғамдық қызметi үшiн беріледі.
Талғат Нәрікбаев университетті 2007 жылдан бастап басқарып келеді. Оның басшылығымен ауқымды реформалар жүзеге асырылып, жоғары оқу орны жаңа даму деңгейіне шықты. Сонымен қатар ол ҚР Сыбайлас жемқорлыққа қарсы іс-қимыл агенттігінің Қоғамдық кеңесінің мүшесі және елорда мәслихатының депутаты болды, бүгінде Академиялық адалдық лигасы кеңесінің төрағасы болып табылады.
Айта кетейік, бұған дейін МNU қызметкерлері мемлекеттік наградаларды ҚР Конституциясының 30 жылдығына орай алған болатын.
