Нашар көретіндерге арналған нұсқа 
Maqsut Narikbayev University Халықаралық журналистика мектебінің студенттері телевизия саласындағы АҚШ-тың басты сыйлығы «Эмми» иегері Чарльз Маклинмен кездесті. Мемлекеттік басқару және коммуникация саласындағы әлемге танымал маман АҚШ-тағы медиа кеңістіктің бөлінуі тақырыбында студенттерге дәріс оқыды.
Чарльз Маклин студенттермен қазіргі заманда журналист мамандығының қалай өзгеріп жатқандығы туралы ойымен бөлісті. Ол әлемдік тәртіп пен медиа салада түбегейлі өзгерістер орын алғанын, ал еркін американдық баспасөз үлкен сын-қатерлерге тап болып отырғанын атап өтті. Сондай-ақ сарапшы қазіргі қауіпті үрдістер туралы айтып, болашақ журналистерге өз кеңестерін берді.
Кездесудің жеке тақырыбы Дональд Трамптың екінші президенттік мерзімі болды. Маклиннің айтуынша, бұл оқиға америкалық БАҚ үшін бұрын-соңды болмаған қарсыластық кезеңін тудырды. Осы тұста АҚШ-тың Республикалық партиясының өкілдері мен демократиялық журналистер арасындағы дәстүрлі текетірес моделі жылдам күйреп жатыр.
Айта кетейік, Чарльз Маклин бес жылдан астам уақыт бойы NBC News Африкалық бюросын басқарған. Сонымен қатар ол MNU Қамқоршылар кеңесінің мүшесі, Borderless Consulting Group компаниясының негізін қалаушы әрі басқарушы директоры, Portland Communications компаниясының серіктесі, сондай-ақ Дүниежүзілік экономикалық форумның коммуникациялар жөніндегі тілшісі және директоры қызметін атқарады.
