Нашар көретіндерге арналған нұсқа 
Maqsut Narikbayev University-ге Германия Федеративтік Республикасының Қазақстандағы Елшісі Моника Иверсен келді. Ол болашақ дипломаттарға дәріс оқыды.
Моника Иверсен студенттерге дипломатиялық мамандықтың ерекшеліктері және Астана мен Берлин арасындағы өзара қарым-қатынастың нығаюы туралы айтып берді. Дәріс «Қолданбалы дипломатия» арнайы курсы аясында өтті. Елші тыңдаушылардың қызығушылығы, белсенділігі және хабардарлығын ерекше атап өтіп, құнды кеңестерімен бөлісті.
«Дипломатқа өз жұмысында түрлі жағдайда жұмыс істеп, түрлі мәселелерді шешуге тура келеді. Осы ретте икемді болу, ашық ақыл-ой, жоғары қызығушылық керек және сұхбаттасушының көзқарасын тыңдай білу қажет. Бұл дағдылар ұстанымды жеткізуге, ортақ шешім табуға және дамуға көмектеседі», – деді Моника Иверсен.
Айта кетейік, сондай-ақ MNU-да Қазақстандағы Германия Елшілігімен бірлескен «Қайта зерделеу. Еске алу мәдениетіндегі ГДР» көрмесі өтті. Іс-шара Германия біртұтас социалистік партиясының қызметін зерделеуге және Германия Демократиялық Республикасының тарихи тәжірибесі мен КСРО-ның ыдырауы арасындағы ұқсастықтар мен айырмашылықтар туралы ой жүгіртуге бағытталды.
