Нашар көретіндерге арналған нұсқа 
Maqsut Narikbayev University-де Қазақстандағы Польшаның Уақытша сенімді өкілі Михал Лабенданың қонақ дәрісі өтті. Дипломат студенттер алдында қазақ тілінде сөз сөйледі.
«Көпмәдениетті әлемде дипломат болу: тәжірибе, сезімталдық және сенім» тақырыбындағы дәріс «Қонақжайлылық» және «Туризм» мамандықтары студенттерінің арасында үлкен қызығушылық тудырды. Михал Лабенда өзінің кәсіби тәжірибесі мен табысты дипломатия туралы айтып, басқа мәдениетті шынайы түсіну оның бірегей тілдік ерекшеліктерін зерделеу, яғни, идиома, мақал-мәтел, әдебиет пен кинематограф арқылы келетінін атап өтті.
«Мен MNU-мен ынтымақтасу мүмкіндігіне өте қуаныштымын. Студенттер маған тамаша әсер қалдырды. Олар өте ақылды, білімді және үш тілді еркін меңгерген. Бұл үлкен құрметке ие. Бірақ мені ең таң қалдырған нәрсе – олардың дәріс кезіндегі белсенділігі мен қатысуы. Олардың сұрақтары терең әрі нақты болды», – деді Михал Лабенда.
Айта кетейік, Польша дипломаты Қазақстанда жоғары білім алып, тоғыз тілді меңгерген. Қонақ дәріс «Мәдениаралық коммуникация» арнайы курсы аясында өтті.
