Нашар көретіндерге арналған нұсқа 
FIBAA аккредиттеу және сертификаттау комитеті Maqsut Narikbayev University-дің «Іскерлік әкімшілендіру магистрі» (MBA) және «Іскерлік әкімшілендіру докторы» (DBA) білім беру бағдарламаларының аккредиттеуін жеті жылға ұзарту туралы шешім қабылдады. Сонымен қатар, MBA бағдарламасы FIBAA премиум мөріне, ал DBA бағдарламасы FIBAA сапа белгісіне ие болды. Бұл олардың бизнес білім беруде жоғары халықаралық стандарттарына сәйкестігін көрсетеді.
FIBAA 1994 жылы Германия, Швейцария және Австрияның сауда-өнеркәсіп палаталарымен құрылған жоғары білім беруді аккредиттеу және сапа сараптамасын жүргізетін халықаралық агенттік. Ұйым экономика, менеджмент, құқық және әлеуметтік ғылымдар саласындағы білім беру бағдарламалары мен жоғары оқу орындарының сапасын бағалайды. Қайта аккредиттеу туралы шешім MNU бағдарламаларының академиялық озықтық, практикаға бағытталған тәсіл және халықаралық бәсекеге қабілеттілік шарттарына сәйкес келетінін растайды.
Естеріңізге сала кетейік, Maqsut Narikbayev University Бизнес-мектебі – жаңа буын басқарушыларын дайындайтын Қазақстандағы жетекші білім беру платформаларының бірі. MBA, EMBA және DBA бағдарламалары стратегиялық ойлауды, көшбасшылық қасиеттерді және бизнесті жүргізудің практикалық дағдыларын дамытуға бағытталған. Оқытудың инновациялық әдістері, салалық сарапшылармен ынтымақтастық және халықаралық аккредиттеулердің арқасында MNU Бизнес-мектебінің түлектері экономиканың әртүрлі салаларындағы басшылық қызметтерде жұмыс істейді. Бұған дейін Бизнес-мектеп республикадағы қазақ тіліндегі алғашқы Mini MBA бағдарламасын да іске қосқан болатын.
