Нашар көретіндерге арналған нұсқа 
Maqsut Narikbayev University Public Lecture жобасы аясында «Қазпошта» АҚ басқарма төрағасы Әсел Жанасованың қоғамдық дәрісі өтті. «Young Global Leaders: Qazpost case» тақырыбындағы дәрісінде спикер компанияның трансформациясы, процестерді цифрландыру, бизнесті әртараптандыру және жаһандық маркетплейстермен ынтымақтастықты дамыту туралы айтты.
Кембридж университетінің түлегі Әсел Жанасова Forbes Woman нұсқасы бойынша Қазақстанның ең ықпалды әйелдер ТОП-25 тізіміне кіреді және Дүниежүзілік экономикалық форумның Young Global Leaders жас жаһандық көшбасшылар тізіміндегі Орталық Азияның жалғыз өкілі болып табылады. Ол ERG, Ұлттық банк, «Зерде» холдингі, АХҚО компанияларында басшылық қызметтерін атқарды, сауда және интеграция вице-министрі болды, ал 2022 жылдың қазан айынан бастап «Қазпошта» АҚ басқарады. Оның басшылығымен ұлттық пошта байланысы операторы бес жыл ішінде алғаш рет таза табыс көрсетіп, әлемнің үздік пошта операторларының ТОП-50 тізіміне кірді.
Спикердің айтуынша, басқарма төрағасы лауазымындағы алғашқы жылындағы ең қиын сәт 20 мың адамнан тұратын ұжымның сеніміне ие болу болды. Сонымен қатар, ол Ұлыбританияда оқу бітіріп, жұмыс істегеннен кейін Қазақстанға оралуы туралы бөлісті.
«Менің жалақым жақсы болды, Лондондағы ірі компанияда жұмыс істедім, бірақ қанағаттанарлық сезінбедім. «Болашақ» бағдарламасы бойынша білім алып, мемлекеттің маған инвестиция салғанын түсіндім. Менің анам ғана болды, ол мұғалім болып жұмыс істеді және ол үшін Кембриджде оқу ақысын төлеу мүмкін емес еді. Мемлекет маған сенім артты, сондықтан мен елдің дамуына өз үлесімді қосуға тиіс деп шештім», – деді Әсел Жанасова.
«Қазпошта» басшысы сондай-ақ MNU басқарма төрағасы Талғат Нәрікбаевпен кездесіп, университеттің инфрақұрылымымен танысты.
«Мен жиі дәріс оқимын, бірақ MNU аудиториясы өте белсенді болды. Студенттердің тақырыпты түсінуі, сана-сезім деңгейі жоғары екенін көрініп тұр. Бұл қуантады – бізде осындай ұрпақ өсіп келеді!», – деді Әсел Жанасова.
Айта кетейік, MNU Public Lecture – бұл Maqsut Narikbayev University-нің жобасы, оның аясында мемлекеттік органдардың басшылары, бизнес капитандары, белгілі тұлғалар мен халықаралық сарапшылар университет студенттері мен қонақтары алдында қоғамдық дәріс береді. Дәрістер студенттерге өздерін қызықтыратын сұрақтар қоюға, көшбасшылармен қарым-қатынаста құнды тәжірибе жинақтауға және шынайы оқиғаларды тыңдап шабыттануға мүмкіндік береді. Формат сондай-ақ мемлекеттік, академиялық және бизнес-қоғамдастықтар арасында байланыс орнатуға ықпал етеді. Жоба дәрістерінің бейне жазбалары MNU Public Lecture YouTube арнасында қолжетімді.
