Әр қазақтың бойынан болашақ дипломатты көремін – Португалия миссиясының басшысы MNU-дағы дәрісі туралы

Maqsut Narikbayev University студенттері Португалияның Қазақстандағы миссиясының басшысы Жозе Атаиде Амаралмен кездесті. Ол «Қолданбалы дипломатия» арнайы курсы аясында қонақ дәрісін өткізді.

Жозе Атаиде Амарал Португалияның сыртқы саясатының негізгі бағыттары туралы айтып, екі мемлекет арасындағы серіктестікті нығайтудың маңыздылығын атап өтті. Дипломат сыртқы саясат ведомствосының болашақ қызметкерлерінің негізгі құзыреті ретінде мәдени хабардарлықтың, диалог пен келіссөздер шеберлігінің рөліне ерекше назар аударды. Сонымен қатар ол «Халықаралық қатынастар» мамандығы студенттерінің сұрақтарына жауап берді.

«MNU-ға келген сайын студенттердің қойған сұрақтарына үнемі таң қаламын. Дипломат ретінде болашақ әріптестеріме барлық нәрсеге қызығушылық танытуға кеңес беремін. Жалпы, көшпенділердің ұрпақтары көптеген адамдармен араласуға үйренген. Менің ойымша, қазақтарда келіссөздер жүргізуге, екі тарап арасында «көпір салуға» ерекше қабілет бар. Сондықтан мен әр қазақтың бойынан болашақ дипломатты көремін», – деп атап өтті Жозе Атаиде Амарал.

Айта кетейік, осы айда MNU-да Португалияның белгілі гитарисі және композиторы Карлос Паредештің 100 жылдығына арналған көрме өтті.