Алматыда заң әдебиетін қазақ тіліне аудару жобасын жүзеге асыру мәселесі талқыланды

Алматыда Maqsut Narikbayev University Emeritus Professor-ы, «Құқық» бағыты бойынша оқу-әдістемелік бірлестіктің әкімшісі Жаннетта Қалишева мен Әл-Фараби атындағы ҚазҰУ басшылығының кездесуі өтті. Тараптар бірлестіктің заң әдебиетін мемлекеттік тілге аудару жөніндегі жобасын іске асыруды талқылады.

Жаннетта Қалишева ҚазҰУ-дың бірінші проректоры Еркін Дүйсеновпен және заң факультетінің деканы Уәлихан Ахатовпен келіссөздер жүргізді. Кездесуде жетекші әлемдік заң әдебиетін қазақ тіліне аударуға, сондай-ақ отандық ғалымдар мен оқытушылардың заманауи оқулықтар әзірлеуіне бағытталған жоба таныстырылды. Сонымен қатар Жаннетта Қалишева ҚазҰУ профессорлық-оқытушылық құрамымен кездесіп, жаңа баспа бағытының тұжырымдамасын таныстырды.

Алматылық университеттің өкілдері бастаманы қолдап, бірлескен жұмысқа дайын екендіктерін білдірді. Сондай-ақ ҚазҰУ жобаға қатысатын университеттер консорциумын қалыптастыру мәселелеріне атсалысады. Оқу-әдістемелік бірлестіктің жұмыс тобының мүшелері жобаны қаржыландырудың бірыңғай қорын іске қосуға ниетті, өйткені жоба республикадағы заң білімін дамытуға және академиялық ортада мемлекеттік тілдің рөлін нығайтуға маңызды қадам болады.

Айта кетейік, MNU заң әдебиетін қазақ тіліне аудару жобасының базалық университеті болып табылады.