Нашар көретіндерге арналған нұсқа 
Maqsut Narikbayev University-де стратегиялық сараптама және басқару саласындағы инновациялық тәсілімен танымал әлемдегі жетекші консалтингтік компаниялардың бірі Boston Consulting Group (BCG) өкілдерінің қонақ дәрісі өтті. Дәріс халықаралық компаниялардағы консалтинг саласы мен мансаптық мүмкіндіктер туралы студенттердің білімін тереңдетуге бағытталған білім беру бастамалары аясында ұйымдастырылды.
Дәріс барысында BCG жоғары білікті мамандары Халықаралық экономика мектебі студенттерімен өз тәжірибелерімен және білімдерімен бөлісті. Сессия консалтинг саласында дамуға ұмтылатын студенттер үшін қызықты тақырыптардың кең ауқымын қамтитын пайдалы ақпаратқа толы болды. Ең алдымен, қонақтар BCG-нің жаһандық дамуы, оның әлемдік экономикадағы рөлі және компания жұмысының негізгі бағыттары туралы сөз қозғады. Студенттер еңбек нарығында қандай білім мен дағдылар сұранысқа ие екенін және әлемдегі ең ықпалды консалтингтік компанияларының біріне жұмысқа орналасу мүмкіндігі жайлы ақпарат алды.
Сонымен қатар, BCG өкілдері студенттерді компания ішіндегі мансаптық траекториямен таныстырды. Әр түрлі лауазымдардағы үміткерлерге қойылатын іріктеу кезеңдері мен негізгі талаптарды қоса алғанда, қызметкерлерді іріктеу процесіне ерекше назар аударылды. Студенттер консалтинг саласында табысты мансап жолын бастау үшін қандай құзыреттер қажет екендігі және компанияның жетекші мамандарымен сұхбаттасуға қалай дайындалу керектігі туралы құнды ақпарат алды.
Іс-шараның ең қызықты және пайдалы сәттерінің бірі интерактивті сессия болды, оның барысында дәріске қатысушылар BCG мамандарымен бірге компания өз жұмысында кездесетін нақты жағдайларды талдауға мүмкіндік алды. Дәрістің бұл практикалық бөлігі студенттерге теориялық аспектілерді жақсы түсініп қана қоймай, алған білімдерін іс жүзінде қолдануға, нақты бизнес-сценарийлерді пысықтауға мүмкіндік берді. Кәсіби білімнен басқа, қатысушылар консультациялық сұхбатқа дайындық бойынша бірқатар практикалық кеңестер алды.
Бұл іс-шара студенттер үшін салалық сарапшылармен байланыс орнатуға арналған алаңға айналды және BCG компаниясында консалтинг саласын терең зерттеу мен мансаптық мүмкіндіктерді кеңейту үшін бірегей мүмкіндік болды. Халықаралық экономика мектебінің студенттері тек консультант мамандығы туралы білімдерін кеңейтіп қана қоймай, әлемдегі жетекші мамандармен байланыстарын нығайта отырып, өздерінің мансаптық өсуіне жаңа көкжиектер ашты.
