Нашар көретіндерге арналған нұсқа 
Maqsut Narikbayev University-де көрнекті ғалым, академик Салық Зимановты еске алды. Университеттің Құрметті ректорының 105 жылдығына орай «Zimanov Readings: заманынан озық ойлар» атты ғылыми-ағартушылық іс-шара өтті.
MNU студенттері мен оқытушылары ғалымның Қазақстанның құқықтық негіздерін қалыптастыру мен дамытуға қосқан үлесі және құқықтық мұрасын талқылады. Іс-шараға қатысушылар академиктің жоғары кәсіби біліктілігін, ғылыми батылдығы мен оның отандық заң ғылымы мектебінің қалыптасуындағы ерекше рөлі туралы мазмұнды баяндамалар жасады. Сонымен қатар профессордың еңбектері таныстырылды.
«Салық Зимановтың философиялық тұжырымдары өзектілігін жоғалтқан емес. Ғалымның заң мен мемлекет туралы пайымдары тәуелсіз Қазақстанның құқықтық дамуы жағдайында жаңа мазмұнға ие болып, заманауи реформалармен үндесіп отыр. Салық Зимановтың әрбір сөзі – уақыт сүзгісінен өткен тұжырым. Бүгінде оның ойлары қоғамға бағдар беретін рухани-идеялық темірқазық іспетті», – деді MNU Emeritus Professor-ы Рамазан Нұртаев.
Айта кетейік, Салық Зиманов қазақ ғалымдары арасындағы тұңғыш заң ғылымдарының докторы ретінде танымал. Оның «18 ғасырдың соңындағы Қазақстанның саяси құрылымы», «Қазақстан Республикасының Конституциясы мен Парламенті», «Шоқан Уәлихановтың саяси көзқарастары» және басқа да ғылыми еңбектері заң ғылымдарының «алтын қорына» енді.
