Нашар көретіндерге арналған нұсқа 
Maqsut Narikbayev University-де Қазақстан Президентінің әлеуметтік мәселелер жөніндегі кеңесшісі Алексей Цой болды. Ол университет инфрақұрылымымен танысып, басшылықпен кездесу өткізді.
Кездесу барысында студенттер мен түлектердің цифрлық құзіреттілігін дамытуға баса назар аудара отырып, MNU қызметінің негізгі бағыттары таныстырылды. Алексей Цой жасанды интеллект саласындағы жобаларды жүзеге асыру жөнінде ұсыныстар берді. Сондай-ақ ол жоғары білім беру жүйесін дамыту жөніндегі өз көзқарасымен бөлісті.
«Maqsut Narikbayev University академиялық басқару, инфрақұрылым және халықаралық ықпалдастық тұрғысынан жоғары деңгей көрсетіп отырған еліміздегі жетекші заманауи жоғары оқу орындарының бірі. MNU мемлекеттік сектор, бизнес пен халықаралық ұйымдарда тиімді жұмыс істеуге қабілетті мамандарды даярлай отырып, ашық, инновациялық және нәтижеге бағдарланған жаңа университеттік мәдениетті қалыптастыруда», – деді Алексей Цой.
Президенттің кеңесшісі университет басшылығы мен командасының заманауи жоғары білімді дамытуға, халықаралық стандарттарды енгізуге және бәсекеге қабілетті адами капиталды қалыптастыруға қосып отырған үлесін ерекше атап өтті. Өз кезегінде MNU Басқарма төрағасы Талғат Нәрікбаев жоғары баға мен кәсіби ұсыныстар үшін алғыс білдірді. Тараптар өзара іс-қимыл мәселелері бойынша пікір алмасып, байланыстарды қолдап отыруға келісті.
