Нашар көретіндерге арналған нұсқа 
Халықаралық сыбайлас жемқорлыққа қарсы күрес күнінде мемлекеттік органдардың басшылары, сарапшылар мен жетекші жоғары оқу орындарының ректорлары Maqsut Narikbayev University-де (MNU) білім беру жүйесінде академиялық адалдықты ілгерілетуді талқылады. Университетте «Адал білім – адал ұрпақ» республикалық форумы өтті.
Іс-шараға ҚР Мемлекеттік қызмет істері агенттігі (МҚІА) бастамашы болды. Форум жұмысына 300-ден астам адам қатысты. Олар жоғары білім беру жүйесінде академиялық адалдықты қамтамасыз етудің стратегиялық тетіктері, сыбайлас жемқорлыққа төзбеушілікті қалыптастыру, орта және техникалық білім беру ұйымдарына академиялық адалдықты нығайту жөніндегі басқарушылық шешімдер мәселелерін талқылады.
Форум барысында МҚІА төрағасы Дархан Жазықбай, ҚР Ғылым және жоғары білім министрі Саясат Нұрбек, ҚР Оқу-ағарту министрі Жұлдыз Сүлейменова, MNU Басқарма төрағасы – Академиялық адалдық лигасы Кеңесінің төрағасы Талғат Нәрікбаев сөз сөйледі. Тараптар Академиялық адалдықты нығайту жөніндегі бірлескен жұмыс туралы меморандумға қол қойды және 2026-2027 жылдарға арналған Жол картасын бекітті. Құжат адалдық мәдениетін дамыту, сыбайлас жемқорлыққа қарсы халықаралық стандарттарды енгізу, әдеп, құқықтық сауаттылық және кәсіби жауапкершілік жөніндегі бағдарламаларды кеңейту жөніндегі іс-шаралар кешенін көздейді.
«Академиялық адалдық лигасы құрылғаннан жеті жыл өткен соң, біз бұл жай ғана қауымдастық емес, академиялық адалдықты жүйелі деңгейде қабылдауды өзгертетін көмек платформасы деп сеніммен айта аламыз. Лига принциптері «Заң мен тәртіп» тұжырымдамасына және Президенттің «Әділетті Қазақстан» идеологиясына толығымен сәйкес келеді», – деді Талғат Нәрікбаев.
Академиялық адалдық лигасы Кеңесінің басшысы бүгінгі таңда Лига 22 қазақстандық университетті біріктіретінін атап өтті. Соңғы жылы Академиялық адалдық орталығының (АҚШ) халықаралық стандарты негізінде мониторингтің жаңа моделі енгізілді, мектептер, колледждер және жоғары оқу орындарымен жұмыс кеңейтілді, Академиялық ортада жасанды интеллектіні пайдалану жөніндегі нұсқаулықты жаңарту басталды, Лиганың жаңа стандарттары қабылданды және сарапшылар желісі күшейтілді. Сонымен қатар МҚІА төрағасы Дархан Жазықбай форумның стратегиялық маңыздылығын атап өтіп, Мемлекет басшысының жоғары оқу орындарында академиялық адалдықды бұзғаны және сыбайлас жемқорлық фактілері үшін лицензиядан айыруға дейінгі қатаң жауапкершілікті енгізу жөніндегі тапсырмасын еске салды.
«Біз қазір білім беру жүйесінде өскелең ұрпаққа қандай құндылықтарды сіңірсек, ертеңгі күні соның жемісін көреміз. Адал ұрпақ тәрбиелесек, адал қоғам құрамыз. Академиялық адалдық осындай дұрыс бағыт-бағдарды көздейтін ұтымды ұстаным», – деді Дархан Жазықбай.
Агенттік басшысының баяндамасында мектептер, колледждер мен университеттерде адалдық принциптерін нығайту ұлттық қауіпсіздікті қамтамасыз етудің бір бөлігі ретінде қарастырылатыны атап өтілді. Сондай-ақ білім беру саласындағы сыбайлас жемқорлық тәуекелдерін талдау нәтижелері мен басшыларды ашық түрде жұмысқа шақыру тетіктерін одан әрі жетілдіру, мүдделер қақтығысын болдырмау және басқару стандарттарын арттыру қажеттілігі талқыланды. Ал ҚР Ғылым және жоғары білім министрі Саясат Нұрбек сыбайлас жемқорлыққа қарсы мәдениетті қалыптастыру мектепке дейінгі кезеңде басталуы керек деп ұсынды.
Айта кетейік, Академиялық адалдықты ілгерілету жөніндегі форум MNU-да 2024 жылы да өткен болатын.
