Нашар көретіндерге арналған нұсқа 
Maqsut Narikbayev University-де «Құқық» бағыты бойынша оқу-әдістемелік бірлестігі жұмыс тобының отырысы өтті. Сарапшылар үш күн бойы болашақ заңгерлерді даярлау жүйесіндегі жаңа тәсілдерді талқылады.
Жұмыс тобының құрамында MNU, ҚР Бас прокуратурасы жанындағы Құқық қорғау органдары академиясы, ҚР Жоғары Сот Кеңесі жанындағы Әділет академиясы, ҚР ғылым және жоғары білім министрлігі, ҚР әділет министрлігі өкілдері мен жұмыс берушілер болды. Олар 2025 жылғы сәуір айында өткен заң білімін дамыту тақырыбына арналған Парламенттік тыңдаулардың ұсынымдарын қарастырды. Сонымен қатар қатысушылар жұмыс берушілердің сұраныстарын ескере отырып, «Құқық» бағыты бойынша білім беру бағдарламасын жаңарту, пәнаралық курстар енгізу, жаңа түлек моделін әзірлеу және заң клиникаларының жұмысын дамыту мәселелерін талқылады.
Жанды пікірталас білім беру саласында жасанды интеллект технологияларын пайдалану, оның түрлері мен ЖИ қолдану стандарттарын қалыптастыру тақырыбы төңірегінде өрбіді. Жұмыс тобының мүшелері MNU профессорлық-оқытушылар құрамы әзірлеп жатқан «ЖИ-ге кіріспе» атты жаңа курстың мазмұнымен танысты. Бұдан бөлек, мемлекеттік тілдегі заманауи заң әдебиеті ұсынылып, оның қаржыландыру мәселесі қозғалды.
Отырыстың қатысушылары мемлекеттік тілде оқу құралдарын жазу әдістемесін айқындау бойынша ойларымен бөлісіп, «Құқық» бағыты бойынша ғылыми зерттеулерді жариялау мәселесіне ұсыныстар енгізді. Сондай-ақ заң пәндерінің оқытушыларына арналған қысқы және жазғы мектептер аясында біліктілікті арттыру орталығын құру қолдау тауып, заң саласында салалық біліктілік шеңберін қалыптастыру бойынша Жол картасы әзірленді.
