Ханзада Уильям MNU Қамқоршылық кеңесінің төрағасына орден табыстады

Ханзада Уильям Maqsut Narikbayev University Қамқоршылық кеңесінің төрағасы Кристофер Кэмпбелл-Холтқа Британ империясының орденін табыстады. Салтанатты рәсім Виндзор сарайында (Англия, Виндзор қ.) өтті.

Айта кетейік, осы жылдың маусым айында Кристофер Кэмпбелл-Холт Британ империясы орденінің офицері (ОВЕ) атағына ие болды. Биыл Ұлыбритания алдындағы немесе халықаралық деңгейдегі айрықша еңбегі үшін 110 адам марапатталды. Олар британ сыртқы саясаты мен халықаралық дамуына қосқан үлесі, сондай-ақ еріктілік пен қайырымдылық қызметі үшін атап өтілді.

Қазақстан Республикасының Ұлыбритания және Солтүстік Ирландия Құрама Корольдігіндегі Елшілігі Кристофер Кэмпбелл-Холттың көшбасшылығы мен стратегиялық көзқарасы АХҚО Сотының Еуразияда халықаралық дауларды шешу үлгісіне айналуында шешуші рөл атқарғанын атап өтті. Ол Ұлыбритания, АҚШ, Таяу Шығыс пен Орталық Азия елдерінде 20 жылдан астам тәжірибесі бар халықаралық құқық пен қаржы саласында жоғары беделге ие сарапшы болып табылады. Кристофер Кэмпбелл-Холт 2025 жылдың 31 қаңтарынан бастап MNU Қамқоршылық кеңесін басқарады.

Maqsut Narikbayev University Кристофер Кэмпбелл-Холтты жоғары атағымен тағы бір мәрте құттықтайды және қызметіне табыс тілейді!