Нашар көретіндерге арналған нұсқа 
Maqsut Narikbayev University Euronews Академиясының курстары қайта басталды. Республикалық және өңірлік БАҚ қызметкерлері «Тележурналистика және тікелей эфир» модулі бойынша оқудан өтті.
Модуль аясында журналистер телевизиялық форматтардың негіздері мен сценарий құрылымы, продюсерлік және редакторлық жұмыс, кадр жұмысы мен сұхбат техникасы туралы білді. Курс қатысушыларымен Euronews-тің Астанадағы бюросының басшысы Боян Бркич және Еуропалық одақ мәселелері жөніндегі аға корреспондент Серджио Кантоне өз тәжірибелерімен бөлісті. Бағдарлама сондай-ақ жаһандық контекстегі оқиғалардың мағынасын ашу, хабар тарату және телебағдарламаны дайындау тақырыптарын қамтыды.
Euronews академиясының курстары журналистика және медиа саласындағы кәсіби дағдыларды дамытуға бағытталған. Қатысушылар телеарнаның білім беру бағдарламалары мен тағылымдамаларына қол жеткізіп, халықаралық жетекші сарапшылардан тәжірибелік білім алады. Жоба Euronews, «Медиа даму қоры» корпоративтік қоры және Астана қаласының жоғары оқу орындары арасындағы меморандум аясында іске асырылуда, онда Maqsut Narikbayev University курстарды өткізу базасы ретінде белгіленген. Бұған дейін курстардан MNU студенттері, журналистер және отандық медиа менеджерлер өткен болатын.
Айта кетейік, Euronews академиясы қараша айының ортасында цифрлық журналистика бойынша курстар өткізуді жоспарлап отыр.
