Жас ғалымдар MNU-да Индустрия 4.0 жағдайындағы құқық мәселелерін талқылады

Студенттер мен жас ғалымдар Maqsut Narikbayev University-де төртінші өнеркәсіптік революция жағдайындағы құқық мәселелерін талқылады. Жоғары оқу орнында жыл сайынғы заң саласындағы халықаралық ғылыми-практикалық конференциясы өтті.

«MNU Annual Legal Conference 2026» тақырыбы «Төртінші өнеркәсіптік революция жағдайындағы құқық: динамика және тұрақтылық» болды. Конференция аясында цифрландыру жағдайында конституциялық құқықтар мен бостандықтарды трансформациялау, босқындар мен азаматтығы жоқ адамдардың құқықтарын сот тәжірибесін талдау арқылы қорғау мәселелері, сондай-ақ жануарлардың құқық субъектілігінің пікірталас аспектілері және заң логикасындағы деонтикалық модальділіктің мәні қаралды. Бұдан басқа, қатысушылар Халықаралық еңбек ұйымының бастамалары аясында платформалық экономикада лайықты еңбектің халықаралық стандарттарын енгізу және Қазақстан, Ресей мен Өзбекстанда корпоративтік шарт институтын дамыту перспективаларын талқылады.

Іс-шара жас ғалымдар арасында үлкен қызығушылық тудырды. Конференцияда Қазақстан мен Ресейдің жетекші жоғары оқу орындарының 60-қа жуық өкілі баяндама жасады. Іс-шара қазіргі заманғы сын-қатерлерді талдауға, құқықтық қайшылықтардың шешімін іздеуге және заң ғылымында жаңа трендтер қалыптастыруға дайын адамдарға арналған алаңға айналды.

Айта кетейік, үздік бяандамалар арнайы номинациялармен атап өтілді, ал қатысушылардың материалдары жақын арада түрлі жинақтарға енгізіледі.