MNU Қытайлық шетелдік жоғары оқу орындарының реестріне енгізілді

Maqsut Narikbayev University халықаралық аренада өз тұғырын нығайтуда. Жоғары оқу орны Қытай академиялық алмасуларға қызмет көрсету орталығының (CSCSE) шетелдік университеттерінің тізбесіне енгізілді.

CSCSE ресми реестрді жүргізетін, сондай-ақ білім және ғылыми дәрежелер туралы шетелдік құжаттарды бағалау, нострификациялаумен (тану) айналысатын ұйым. Орталық өз қызметін ҚХР Білім министрлігінің жанынан жүзеге асырады. Университеттің бұл реестрге енгізілуі Қытайда жұмыс жасау немесе білім алуды жалғастыруды жоспарлап отырған түлектер үшін маңызды.

Айта кетейік, MNU қытайлық оқу орындарымен ынтымақтастықты белсенді түрде кеңейтуде. Биыл университет AI Law магистрлік білім беру бағдарламасын Қытай саяси ғылымдар және құқық университетімен бірлесе отырып іске қосты, сондай-ақ Бейжің тіл және мәдениет университетімен бірге қос дипломдық бағдарламаны ашу туралы ниет білдірді. Бұдан басқа университеттің білім беру бағдарламалары он беделді халықаралық аккредиттеу рейтингтік агенттіктерімен танылған.