Нашар көретіндерге арналған нұсқа 
Maqsut Narikbayev University-де «HR & Құқық» кәсіби біліктілікті арттыру бағдарламасы аяқталды. 55 маман оқудан сәтті өткені туралы сертификаттарға ие болды.
«HR & Құқық» бағдарламасы төртінші рет іске асырылып, онлайн форматта өтті. 2,5 ай бойы республикалық кәсіподақтар мен жұмыс берушілер бірлестіктерінің, заң және кадр қызметінің басшылары мен жетекші мамандары еңбек қатынастарының барлық аспектілері мен HR-менеджмент негіздерін игерді. Олар еңбек және азаматтық-құқықтық келісімшарттардың аражігін ажыратудан бастап, еңбекақы төлеу, өндірістегі жазатайым оқиғаларды тергеу және ұжымдық-шарттық реттеу мәселелеріне дейінгі еңбек даулары бойынша жүзден астам істі егжей-тегжейлі талдады.
Бағдарламаның оқытушылары осы салада елеулі тәжірибесі бар 7 жоғары білікті сарапшы болды. Сарапшылардың басым бөлігін MNU профессорлары құрады. Бұдан басқа, оқытушылардың барлық зерделенген және авторлық материалдары бағдарлама түлектері үшін Canvas арнайы білім беру платформасында тұрақты түрде қолжетімді болады.
Айта кетейік, «HR & Құқық» бағдарламасы құқықтану, HR-менеджмент, конфликтология тоғысында пәнаралық сипатқа ие және өзінің мазмұны бойынша нарықта баламасы жоқ.
