MNU-да өзбек ақындары Науаи мен Бабырдың рухани мұрасы талқыланды

Maqsut Narikbayev University-де Әлішер Науаи мен Захиредден Мұхамед Бабырдың әлемдік әдебиет, ғылым мен мәдениетті дамытуға қосқан үлесі талқыланды. Өзбекстанның ұлы ақындарының туған күніне орай университетте мәдени-ағарту іс-шарасы өтті.

Іс-шара барысында құндылықтар мен мәдениетаралық диалогты нығайтудағы Науаи мен Бабырдың рөліне ерекше назар аударылды. Сонымен қатар, ақындардың туындылары ұсынылған кітап көрмесі ұйымдастырылды. Іс-шараға депутаттар, Қазақстан халқы Ассамблеясының мүшелері, дипломатиялық корпус өкілдері, университет профессорлары мен студенттері қатысты.

«Қазақстан мен Өзбекстан мәдениеттері өзара тығыз тарихи және гуманитарлық байланысқа ие. Әлішер Науаи мен Захиредден Мұхамед Бабырдың әдеби және философиялық мұрасын зерделеу өңірдің ортақ мәдени кеңістігін түсінуде маңызды. Сондай-ақ бұл академиялық ортада мәдениетаралық диалогты нығайтуға ықпал етеді», – деп атап өтті MNU Провосты Анар Ибраева.

Айта кетейік, іс-шара Өзбекстанның Қазақстандағы Елшілігі және Астана қаласының өзбек этномәдени орталығымен бірлесіп ұйымдастырылды.