MNU мен Coventry University Kazakhstan ынтымақтастық туралы келісті

Maqsut Narikbayev University мен Coventry University Kazakhstan ынтымақтастық туралы меморандумға қол қойды. Тараптар ғылым, жасанды интеллект, ағылшын тілі салаларындағы жобаларды дамытуға келісті.

Меморандумға MNU Провосты Анар Ибраева мен Coventry University Kazakhstan Президенті Мирас Дәуленов қол қойды. Келісім ЖИ саласындағы ынтымақтастықты, бірлескен ғылыми бастамаларды, гранттық қаржыландыруға өтінімдер дайындауды және білім алушылар үшін зерттеу практикасын көздейді. Бұған қоса үздіксіз кәсіби даму курстары, ағылшын тілі оқытушыларына арналған бағдарламалар және білім беру саласындағы іс-шараларды ұйымдастыру туралы уағдаластыққа қол жеткізілді.

Coventry University Kazakhstan делегациясы сондай-ақ MNU инфрақұрылымымен танысты. Британдық жетекші жоғары оқу орындарының бірінің филиалы 2024 жылдың қыркүйегінде Астанада ашылған болатын. Бүгінде университет алты білім беру бағдарламасын жүзеге асыруда.

Айта кетейік, бұған дейін MNU-да Cardiff University Kazakhstan-мен серіктестік перспективалары талқыланды.