Нашар көретіндерге арналған нұсқа 
Maqsut Narikbayev University-де Кипр Республикасының Қазақстандағы Елшісі Петрос Накузис сөз сөйледі. Дипломат «Халықаралық қатынастар» білім беру бағдарламасының студенттеріне дәріс оқыды.
Петрос Накузис Кипрдің тәуелсіздік алғаннан бергі тарихы мен сыртқы саясаты, елдің стратегиялық маңызы және өңірдегі рөлі туралы айтып берді. Сондай-ақ аралда орналасқан мемлекеттің дипломатиясының ерекшеліктері және оның басқа елдермен өзара іс-қимылы талқыланды. Елші студенттердің сұрақтарына да жауап берді.
«Дәріс тыңдаушылары жоғары дайындық деңгейін, тақырыпты терең түсінуді және талқылауға салмақты көзқарасты көрсетті. Олардың сұрақтары мені ерекше таң қалдырды. Мен алдағы уақытта сіздердің университеттеріңіз бен Кипрдің жоғары оқу орындары арасындағы ынтымақтастықты дамыта алатынымызға үміттенемін», – деді Петрос Накузис.
Дипломат сондай-ақ MNU студенттерінің жұмысына деген жауапкершілігін жоғары бағалады. Биыл ашылған Кипрдің Қазақстандағы елшілігінде оннан астам студент тағылымдамадан өтті. Олар Астана мен Ларнака арасындағы тікелей әуе қатынасы іске қосылғаннан кейін келушілердің жоғары сұранысы аясында визалық бөлімнің қызметіне өз үлестерін қосты.
Айта кетейік, Кипр Қазақстанның Еуропадағы маңызды серіктестерінің бірі. Биыл маусым айының басында Астанаға ресми сапармен Кипр Президенті Никос Христодулидис келді. Бұл Кипр мемлекеті басшысының Қазақстанға алғашқы тарихи сапары болды.
