Нашар көретіндерге арналған нұсқа 
Maqsut Narikbayev University-де ҚР Мемлекеттік қызмет істері агенттігінің төрағасы Дархан Жазықбайдың қонақ дәрісі өтті. Дәріске мемлекеттік қызметке және осы саладағы мансаптық мүмкіндіктерге қызығушылық танытқан студенттер қатысты.
Кездесу барысында Дархан Жазықбай мемлекеттік қызметтегі жұмыстағы өзекті аспектілер, кадрларды іріктеудің жаңа механизмдері және кәсіби этиканың маңыздылығы туралы баяндады. Ол мемлекеттік қызметтің жай ғана мансап емес, елдің дамуына үлес қосу мүмкіндігі екенін атап өтті. Әсіресе, «Адал азамат» тұжырымдамасының маңыздылығын атап өтіп, мемлекеттік қызметтің әділдік, кәсібилік және қоғам мүддесіне бағытталу қағидаттарына негізделуі тиіс екеніне тоқталды.
Спикер мемлекеттік басқару жүйесіндегі жаңашылдықтарға тоқталып, кадрларды іріктеу процесінің цифрландырылуы мен бюрократиялық кедергілердің азаюын атап өтті. Дәріс барысында MNU студенттері мемлекеттік қызметке орналасу, мансаптық өсу, іріктеу талаптары мен жалақы деңгейі сұрақтарына қызығушылық танытты. Дархан Жазықбай барлық сауалдарға жан-жақты жауап беріп, қазіргі таңда мемлекеттік қызметтің жас мамандарға ашық әрі айқын мүмкіндіктер ұсынатынын ерекше атап өтті.
«Бізге заманауи талаптарға сай, оның ішінде цифрлық басқару мен жасанды интеллектті басқаруға бейімделген тар сала мамандарын даярлау қажет. Мұндай мамандар мемлекеттік органдармен тығыз ынтымақтастықта жұмыс істеуі тиіс. Жалпы, қазіргі таңда дарынды әрі білікті кадрларды елде ұстап қалу, оларды мемлекет игілігі үшін жұмыс істеуге ынталандыру өте маңызды. Сондықтан біз осы үрдістерге дайын болуымыз қажет», – деді ҚР Мемлекеттік қызмет істері агенттігінің төрағасы Дархан Жазықбай.
МҚІА төрағасы Президенттік жастар кадр резервіне енген 400 маманның 28-і – Maqsut Narikbayev University түлектері екенін ерекше атап өтті. Ведомство басшысы мемлекеттік қызметке қызығушылық танытып, «Жас мемлекеттік қызметші мектебі» жобасына белсенді қатысқан MNU-дің 3-4 курс студенттеріне алғыс хаттар табыстады. Бұл жоба жастардың көшбасшылық қабілеттерін дамытып, мемлекеттік қызметке дайындық деңгейін арттыруға бағытталған.
Сонымен қатар, Дархан Жазықбай MNU Басқарма төрағасы Талғат Нәрікбаевпен кездесіп, MIND ғылыми-талдау орталығының қызметімен танысты. ҚР Мемлекеттік қызмет істері агенттігінің төрағасына Ақмола облысында БҰҰ-ның Тұрақты даму мақсаттары бойынша акселератордың іске қосылу нәтижелері туралы баяндалды. Тараптар әртүрлі бағыттар бойынша ынтымақтастықты дамыту мәселесін де талқылады.
Айта кетейік, Maqsut Narikbayev University мемлекеттік органдармен серіктестікті белсенді дамытып, студенттерге білім мен тәжірибені тікелей сала мамандарынан алу мүмкіндігін ұсынуда. Мұндай кездесулер студенттердің ой-өрісін кеңейтіп қана қоймай, болашақ Қазақстанның кадрлық резервін қалыптастыруға да ықпал етеді.
