Нашар көретіндерге арналған нұсқа 
Maqsut Narikbayev University-де (MNU) «Жасанды интеллект дәуіріндегі заңгерлік мамандықтың болашағы: жаһандық сын-қатерлер және жаңа парадигмалар» атты халықаралық ғылыми-практикалық конференция өтті. Ғалымдар мен сарапшылар ЖИ-дің заңгерлік білімге әсері, заңгерлердің кәсіби құзыреті және цифрлық трансформация жағдайында құқықтық жүйенің дамуын талқылады.
Конференция жұмысына ғылым және жоғары білім, әділет, ұлттық экономика вице-министрлері, Құрылтай мен Сот әкімшілігі өкілдері, Республикалық нотариаттық палата мен адвокаттар палатасының мүшелері, ғалым-заңгерлер, халықаралық заң компанияларының серіктестері, сондай-ақ АҚШ, Қырғызстан, Түркия және Өзбекстаннан сарапшылар қатысты. Іс-шараның негізгі мақсаты жасанды интеллектіні енгізу жағдайында заңгерлік мамандықты дамытудың практикалық тәсілдерін әзірлеу болды. MNU Басқарма төрағасы Талғат Нәрікбаев жоғары оқу орындары білім беру бағдарламаларын уақтылы қайта қарап, заңгерлерді даярлауға қойылатын жаңа талаптарды ескеруі тиіс екенін атап өтті.
«Заң факультеттерінің түлектері жасанды интеллектінің дамуына байланысты жұмыс орындары үшін бәсекелесуде. Біз университеттер ретінде уақыт талабына сай бағдарламаларымызды өзгертіп, жаңартуымыз керек. Заңгер үшін қажетті іргелі білімдер мен цифрлық дағдыларды, сондай-ақ ЖИ дайындаған құқықтық қорытындыны тексеру мен құпия деректерді қорғау әдістерін анықтау бойынша сұрақтарға біз әзірлеген ортақ жауаптар заңгерлік білімнің мазмұнын жаңартуға және құқық қолдану сапасын арттыруға көмектесетініне сенімдімін», – деді Талғат Нәрікбаев.
Конференцияны 2025-2030 жылдарға арналған Қазақстан Республикасында заңгерлік білімді дамыту тұжырымдамасын жүзеге асыру аясында «Құқық» бағыты бойынша Республикалық оқу-әдістемелік кеңесінің Оқу-әдістемелік бірлестігі ұйымдастырды. Қатысушылар сондай-ақ мамандарды даярлау процесіне жаңа технологияларды ықпалдастыру мәселелерін қарастырды. ҚР Әділет вице-министрі Айдар Жарылғанов технологиялық сауаттылық іргелі заңгерлік дайындықты алмастырмай, толықтыруы тиіс екенін атап өтті.
«Заңгерлік білімнің цифрлық трансформациясы сын тұрғысынан ойлау, заң этикасы, құқықтық талдау дағдыларын дамыту және қабылданатын шешімдердің әлеуметтік салдарын түсінумен бірге жүруі тиіс. Болашақтың заңгері – технологияны қолдана алатын маман. Бұл ретте ЖИ іргелі адами білімді алмастырмайтынын түсіну маңызды. Керісінше, технология неғұрлым жетілдірілсе, заңгердің алынған нәтижелерді тексеру, қателерді анықтау және заңды негізделген қорытындыларды тұжырымдау қабілетіне қойылатын талаптар соғұрлым жоғары болады», – деді Айдар Жарылғанов.
Конференция қорытындысы бойынша Қазақстанда заңгерлік білімді трансформациялау бойынша ұсыныстар әзірленді. Айта кетейік, MNU «Құқық» бағыты бойынша Оқу-әдістемелік бірлестіктің базалық университеті ретінде белгіленген.
