Нашар көретіндерге арналған нұсқа 
Maqsut Narikbayev University-де «Жасанды интеллектіні пайдаланумен бухгалтерлік есеп» жаңа білім беру бағдарламасы іске қосылды. Талапкерлердің құжаттарын қабылдау осы жылдың 25 тамызына дейін (қоса алғанда) жалғасады.
Бакалавриат бағдарламасы MNU Халықаралық экономика мектебінің базасында жүзеге асырылады. Жаңа бағыт заманауи цифрлық технологиялардың көмегімен классикалық қаржылық процестерді қайта ойластыруға қабілетті мамандар даярлауға бағытталған. Оқыту толығымен ағылшын тілінде өтеді, ал түлектер бизнес әкімшілендіру бакалавры дәрежесін алады.
Бағдарламаның басты ерекшелігі – қатаң халықаралық стандарттар мен озық IT құралдарды біріктіретін гибридтік бейінді құру. Студенттер қаржылық және басқарушылық есеп, аудит, салық салу мен корпоративтік қаржы саласында іргелі білім алады. Бұл ретте оқу жоспары технологиялық пәндер блогымен күшейтілген: Python бағдарламалау мен деректермен жұмыс істеуден бастап терең оқыту, жасанды интеллект және киберқауіпсіздік жүйелерін пайдалануға дейін.
Болашақ мансап үшін маңызды артықшылық ретінде ACCA қаржы, бухгалтерлік есеп және аудит саласындағы жаһандық кәсіпқойлар қауымдастығының бағдарламаны ресми аккредиттеуі болады. Бұл түлектерге жаһандық мойындалған біліктілікті алу жолында бейіндік емтихандардың бір бөлігін автоматты түрде тапсыруға мүмкіндік береді. Студенттер бухгалтерлік және басқарушылық есеп процестерін толық автоматтандыруды, сондай-ақ деректер негізінде стратегиялық шешімдер қабылдау үшін ЖИ технологияларын тиімді қолдануды үйренеді.
Түлектер жаңа үлгідегі қаржы талдаушысы, бизнес үшін ІТ шешімдерді әзірлеуші, есепке алуды автоматтандыру жөніндегі мамандар және тәуекелдер жөніндегі консультанттар болып жұмыс істей алады. Бұл компанияларға адами фактордан құтылуға және тиімді цифрлық экожүйелерді құруға көмектеседі. Айта кетейік, «Атамекен» ҚР ҰКП білім беру бағдарламаларының рейтингіне сәйкес MNU елімізде экономика, бухгалтерлік есеп және қаржы саласында үздік кадрлар даярлайтын үш жоғары оқу орнының қатарына кіреді. Сонымен қатар университет бағдарламалары QAA, FIBAA, CIMA, ICAEW, GARP, CFA Institute, HRCI, CIM және IQAA сияқты жетекші халықаралық агенттіктерімен аккредиттелген.
MNU-ға оқуға түсу шарттары туралы толық ақпаратты осы сілтеме бойынша алуға болады.
