Нашар көретіндерге арналған нұсқа 
Астанада Жаңа жыл қарсаңында ғылымды мемлекеттік қолдауға арналған салтанатты рәсім өтті. Елордалық университеттер мен ғылыми ұйымдардың он жас ғалымы тұрғын үй сертификатына ие болды.
Жаңа пәтердің иегері Maqsut Narikbayev University Associate Professor-ы Далия Қасқырбаева атанды. Тұрғын үй Мемлекет басшысы Қасым-Жомарт Тоқаевтың ғалымдарға қолдау көрсету және олардың әлеуметтік мәртебесін арттыру жөніндегі тапсырмаларын орындау шеңберінде, сондай-ақ ғылымға жас кадрлардың келуін ынталандыру үшін берілді. Сертификаттарды ҚР Ғылым және жоғары білім министрі Саясат Нұрбек табыстады.
«Жас ғалымдар – Қазақстанның инновациялық дамуы мен зияткерлік әлеуетінің негізі. Тұрақты ғылыми орта қалыптастыруда баспананың маңызды құрал екенін ескере отырып, мемлекет тарапынан әлеуметтік қолдау мәселесіне ерекше көңіл бөлініп жатыр. Осы бағыттағы жұмыстардың нәтижесінде алғаш рет 587 жас ғалым баспанамен қамтылды», – деп атап өтті министр.
Айта кетейік, Далия Қасқырбаева MNU-да 2021 жылдан бері қызмет етіп, зерттеу жұмыстарына үлес қосуда. Оның зерттеулері жетекші халықаралық академиялық журналдарда жарияланады.
