MNU мен KASE Academy студенттерге арналған қосымша мамандандыру бағдарламасын іске қосады

Maqsut Narikbayev University студенттері капитал нарығы мен инвестициялық талдауды тереңдетіп оқи алады. Жоғары оқу орнының Халықаралық экономика мектебі Қазақстан қор биржасының академиясымен (KASE Academy) бірлесіп, қосымша мамандандыру (minor) бағдарламасын іске қосады.

Бағдарлама қаржы нарықтары мен қор қағаз құралдары инфрақұрылымын, этика мен кәсіби стандарттарды, сондай-ақ туынды қаржы құралдарын зерделеуді қамтиды. Практикалық курс аясында білім алушылар Қазақстан қор биржасының нақты кейстерімен жұмыс істейді және ақпаратты дайындау мен жариялаудан бастап биржаға шығуға дейінгі компанияның листингке өту жолын анықтайды. Сондай-ақ, студенттер нақты отандық компанияның қор биржасына шығу жоспарын әзірлеп, оны кәсіби кеңес беру форматында ұсынады.

Minor брокерлік компаниялар, биржалар, басқарушы компаниялар, сондай-ақ корпоративтік қаржы департаменттері және инвесторлармен жұмыс істеу үшін білікті кадрлар даярлауға бағытталған. Minor-ды табысты аяқтау студенттерге тәуекелдерді бағалаудың заманауи құралдарын қолдануға, сауда және трейдингтен кейінгі инфрақұрылым тетіктерін түсінуге, эмитенттердің ESG көрсеткіштерін бағалауға және отандық капитал нарығының реттеуші ортасында еркін бағдарлануға мүмкіндік береді.

Бағдарламаның басталуы бірнеше айдан кейін жоспарланған.