MNU студенттері ірі халықаралық форумда стартап ұсынды

Maqsut Narikbayev University студенттері брендті ілгерілетуге арналған өз платформасын әзірледі. CLICKI атты технологиялық стартап Астанада өткен AI & Digital Bridge 2026 халықаралық форумында таныстырылды.

Платформаның авторлары Халықаралық экономика мектебінің студенттері Асанәлі Тұрсымбаев пен Рауан Айдархан. CLICKI бизнес қызметтерін блогерлер арқылы ілгерілетуге мүмкіндік береді. Тапсырыс берушілер жарнама кабинетінің көмегімен ашық статистиканы көріп, расталған қаралымдар үшін контент жасаушыларға ақы төлейді.

Жоба инвесторларға AI & Digital Bridge 2026 алаңындағы Стартап аллеясында таныстырылды. Алаң робототехника, өнер, ойындар әзірлеу мен вайб-кодинг салаларындағы 90-ға жуық стартап авторларын біріктірді. Бүгінде CLICKI платформасын 300-ге жуық пайдаланушы қолдануда.

Айта кетейік, биыл MNU-да Artificial Intelligence and Frontier Systems: AI + X білім беру бағдарламасы іске қосылды. Оқу барысында студенттер жасанды интеллект технологияларын қолдана отырып, өздерінің жобаларын әзірлейді.